13
январь
2022
МҰҒАЛІМНІҢ КӘСІБИ ҚҰЗЫРЕТТІЛІГІ – ОҚЫТУ САПАСЫН АРТТЫРУ КЕПІЛІ
#130_мектеп МҰҒАЛІМНІҢ КӘСІБИ ҚҰЗЫРЕТТІЛІГІ – ОҚЫТУ
САПАСЫН АРТТЫРУ КЕПІЛІ
Мектептің әдістемелік жұмыс жоспарына сәйкес қысқы каникул күндері аясында «Мұғалімнің кәсіби құзыреттілігі – оқыту сапасын арттыру кепілі» атты семинар жоспарға сай өз жалғасын тапты. Іс-шараның екінші күні мектебіміздің ұстаздары өздерінің тәжірибелерін ортаға салып, шебер сыныптар ұйымдастырып, шығармашылық есептерімен бөлісті.
Семинардың екінші күні директордың оқу-әдістемелік жұмысы жөніндегі орынбасары А.Болганова «Жоспарлауда мақсат қалай қойылады, міндеттер қалай анықталады?» тақырыбында шебер-сынып өткізді. Шебер-сынып барысында «Мақсат дегеніміз не, ол не үшін қажет? Мақсаттың СМАРТ қа сәйкестігін анықтау. Қате тұжырымдар түрлері. СМАРТ талаптар» секілді сабақ мақсатын дұрыс қоюды нақтылайтын негізгі ұғымдар мен тұжырымдарға кеңінен тоқталып, нақты ақпараттар берілді. Заманауи мектептегі сабақтың мақсаты нақтылықпен, оған жету құралдарын көрсетумен және оны нақты дағдыларға ауыстырумен ерекшеленуі тиіс. Сабақ мақсаты нақты, көрсетілетін және өлшенетін болуы керек. Сабақта оқыту мақсаты игерілетін теориялық материал емес, ондағы жасалатын нақты практикалық жұмыстар тұрғысынан қарастырылу керек. Сабақтың оқыту мақсаты жүзеге асатын процеске емес, қол жеткізілетін түпкі нәтижеге бағытталып, оқушылардың не білгенін емес, не үйренгеніне басты назар аудару керек және қойылған мақсат пен қол жеткен нәтиже арасындағы байланысты ашып көрсетіліп, сабақта білімділік мақсатты ғана емес, тәрбие мен дамытушылық мақсаттарды да СМАРТ талаптары арқылы қоюға біртіндеп үйрену керектігін нақтылап атап өтті.
Келесі кезекте мұғалімдер педагогикалық тәжірибелерін тарату мақсатында шебер сыныптар көрсетті.
Музыка пәні мұғалімі Д.Сулейменова шығармашылық есеп берді. Педагогикалық тәжірибесі мол, оқушылары мектепішілік, қалалық байқауларда жеңімпаз атанып жүрген, өз ісінің маманы, өнерлі ұстаз, шығармашылық есебі барысында жетістіктерімен бөлісіп, көрермендерге қазақтың қара домбырасын күмбірлетіп, әуезді әсем ән сыйлап, жеке шығармашылық жұмыстарымен бөлісті.
Өзін-өзі тану пәні мұғалімі Н.Олжабаева «Өзін-өзі тану пәнін оқытуда заманауи әдіс-тәсілдердің тиімділігі» тақырыбында шебер-сынып өткізді. Шебер-сынып барысында оқушыларды топқа бөлу кезеңінде «Кіру билеті», әрі қарай топпен жұмыс кезеңінде «Карусель», «Визуализация», рефлексия кезеңінде «Шығу билеті» әдістерін ұтымды қолданып, оқыту мен оқу тәжірибесіндегі жаңа тәсілдердің тиімді жақтарын көрсетіп, оқушылардың алған білімдерін өмірде пайдалана білу, олардың функционалдық сауаттылығы мен танымдық белсенділігін арттыруға бағыттау өз бетінше білім алуға, шығармашылығын қалыптастыруға ықпал ету жолдарын қарастырды.
Орыс тілі мен әдебиеті пәні мұғалімі М.Бейсеева "Цифровая грамотность" тақырыбында баяндама оқыды. Баяндама барысында үздік цифрлық ресурстарға таныстырылым жасап, оны қолдануын және тиімділігін айтып өтті.
Тиімді тәжірибе және белсенді оқыту әдістемесі бойынша мұғалімдердің танымдық қызметін ұйымдастыруда қолданылатын белсенді және интерактивті әдістер мен тәсілдер туралы білімдерін жетілдірген педагогтер оң пікірлерін айтып, алғыс білдіріп, тың жаңалықтармен танысқанын, өз тәжірибесінде қолданатындығын айтып, кері байланыс жасады.