МАҚТАНЫШЫМ, АЙБАРЫМ, ЖЕЛБІРЕ КӨК БАЙРАҒЫМ!

МАҚТАНЫШЫМ, АЙБАРЫМ, ЖЕЛБІРЕ КӨК БАЙРАҒЫМ!

Шымкент Қаласының Әдістемелік Орталығы 

2021 жылды 08 желтоқсанында Тәуелсіздіктің 30 жылдығына орай ЖҰЛДЫЗДЫ 30 КҮН мерекелік жоспары аясында «Өрлеу» БАҰО  АҚФ Түркістан облысы және Шымкент қаласы ПҚБА институтымен  бірлесіп  «Мақтанышым, айбарым, желбіре көк байрағым» атты  дөңгелек үстел ұйымдастырылды.

 Мақсаты: оқушыларға  Тәуелсіздіктің қадірін ұғындыру,  Қазақстан Республикасының басты жетістіктерімен таныстыру, патриоттық, отаншылдық  сезімін  ояту, елін, жерін, құрметтеуге тәрбиелеу.

Дөңгелек үстелге  тарих пәні мұғалімдері, 9-сынып оқушылары қатысты. 

 Биыл қастерлі Тәуелсіздігімізге 30 жыл толады. Бұл –қайта жаңғырған қазақ мемлекеттігінің, ата-бабаларымыз аңсаған азаттықтың тұғыры нығая түскенін әйгілейтін маңызды белес. Тарих тұрғысынан алғанда, отыз жыл – көзді ашып жұмғандай қас-қағым сәт. Дегенмен, бұл көптеген халықтар үшін қиындығы мен қуанышы, дағдарысы мен дамуы алмасқан тұтас дәуір деуге болады. Біз де осындай жолдан өтіп келеміз. Азаттығымыздың айшықты белесіне шыққанда әрбір саналы азаматты «Отыз жылда біз қандай жетістіктерге жеттік?», «Келер ұрпаққа қандай елді аманаттаймыз?», «Мемлекеттігімізді нығайта түсу үшін тағы не істейміз?» деген сауалдар толғандырары анық. Осы тұрғыдан алғанда, бұл – арман-мақсаттарымызды тоғыстырып, болашаққа тың серпінмен қадам басу үшін өткенге тағы бір мәрте оралатын, жетістіктеріміз бен кемшіліктерімізді ой елегінен өткізетін маңызды мезет.

Осы орайда  оқушылар Тәуелсіздікке қол жеткізу кезіндегі қиындықтар, 30 жыл ішінде егеменді еліміздің жетістіктері жайлы ой қозғап, пікір бөлісті. 

Тәуелсіздік жолында жанын қиған қаһармандарымыздың ерліктеріне бас иіп,  тарихтан алған білімдерін шыңдады.

Бостандық бізге оңайлықпен келген жоқ. Ата-бабаларымыз азаттық жолында арпалысты. Талай зұлмат замандар мен нәубеттерді бастан өткерді. Осының бәрі халықтың есінде сақталып, ұрпақтан ұрпаққа берілуге тиіс. Кезінде «Мәдени мұра» бағдарламасы ұлт шежіресін түгендеуге жол ашты. Отандық тарих ғылымы тың серпінмен дамып, түрлі бағыттар бойынша көптеген зерттеу жүргізілді. Бұрын бәймәлім болған қаншама тарихи деректер, археологиялық қазыналар табылды. Тарихымыз сан мың жылдан тамыр тартатынын айғақтайтын жаңалықтар ашылды.  

«Тәуелсіздіктің жемісі»  тақырыбында бейнеролик көрсетілді.

Іс-шара соңында «Өрлеу» БАҰО аға оқытушылары А.Естемирова мен Н.Сапарова оқушыларға және тарих пәні мұғалімдері А.Рустемоваға, А.Жумановаға алғыстарын білдіріп, сертификат табыстады.